Home » ६८व्या विदर्भ साहित्य संमेलनाच्या अध्यक्षपदी डॉ. वि. स. जोग

६८व्या विदर्भ साहित्य संमेलनाच्या अध्यक्षपदी डॉ. वि. स. जोग

by नवस्वराज
0 comment

नागपूर : डिसेंबरच्या १६,१७ आणि १८ या तारखांना चंद्रपूर येथे आयोजित होणाऱ्या ६८व्या विदर्भ साहित्य संमेलनाच्या अध्यक्षपदी सुप्रसिध्द समीक्षक आणि ललितलेखक म्हणून प्रसिध्द असलेले ज्येष्ठ साहित्यिक डॉ. वि. स. जोग यांची संमेलनाध्यक्ष म्हणून विदर्भ साहित्य संघातर्फे निवड करण्यात आली.

चंद्रपूरची सर्वोदय शिक्षण संस्था, सूर्यांश साहित्य आणि सांस्कृतिक प्रतिष्ठान आणि गोंडवना विद्यापीठाच्या संयुक्त विद्यमाने या साहित्य संमेलनाचे आयोजन करण्यात आले आहे. विदर्भ साहित्य संघाचे दिवंगत अध्यक्ष मनोहर म्हैसाळकर यांच्या स्मृतिंना हे संमेलन समर्पित करण्यात आले आहे. कथा, कादंबरी, समीक्षा, नाटक, चित्रपटविषयक समीक्षा, चरित्र, आत्मचरित्र अशा विविध वाङ् मय प्रकारात जोग यांनी लेखन केले आहे. त्यांच्या लेखनाला विविध पुरस्कारांनी गौरविले आहे. ‘दुपार’, ‘नातं’ हे कथासंग्रह; ‘आई’, ‘आम्ही’, ‘संहार’,‘ग्रीष्मदाह’, ‘मकरंद मुमताज’ या कादंबऱ्या; ‘शह-प्रतिशह’, ‘तिघांच्या तीन तऱ्हा’ ही नाटके; ‘दोन झुंजार पत्रकार’,‘कवी आणि कविता’, ‘सावरकर आंबेडकर विचार समीक्षा’, या समीक्षा लेखनासोबतच ‘मार्क्सवाद आणि मराठी साहित्य’ आणि ‘मार्क्सवाद आणि दलित साहित्य’ हे मराठी साहित्याची मार्क्सवादी परिप्रेक्ष्यातून मांडणी करणारे महत्त्वाचे ग्रंथ प्रकाशित आहेत. त्याशिवाय ‘गरुडझेप’, ‘युगस्पंदन’, ‘डॉ.अ. ना. देशपांडे स्मृतीग्रंथ’,‘साहित्यिक खांडेकर’, ‘भारतीय कम्युनिस्ट ’, ‘देशगौरव सुभाषचंद्र बोस’, ‘कवी आणि कविता’, ‘अभिनय सम्राज्ञी मीनाकुमारी’, ‘सौंदर्य सम्राज्ञी मधुबाला’, ‘यश अपयश’, ‘रुपेरी इतिहासाची सोनेरी पाने’ इत्यादी सुमारे 32 वर पुस्तके प्रकाशित आहेत. त्यांना या लेखनासाठी विदर्भ साहित्य संघाचा वाङ् मय पुरस्कार, पु.भा. भावे पुरस्कार इत्यादी पुरस्कारांसोबतच विदर्भ साहित्य संघाचा महत्त्वाचा समाजाला जाणारा जीवनव्रती पुरस्कार आणि सोविएत लँड नेहरू पुरस्काराने गौरविले आहे.

विदर्भ साहित्य संघाचे अध्यक्ष प्रदीप दाते, कार्याध्यक्ष डॉ. रवींद्र शोभणे, सरचिटणीस विलास मानेकर, रंजना दाते, आयोजन समितीचे अध्वर्यू डॉ. कीर्तिवर्धन दीक्षित, संमेलन समितीचे कार्याध्यक्ष प्राचार्य डॉ. प्रमोद काटकर, सहकार्यवाह इरफान शेख यांनी डॉ. जोग यांच्या निवासस्थानी जाऊन त्यांचा सत्कार केला.

तुम्हाला देखील आवडेल

error: Content is protected !!